सोनिया गांधी या जन्माने रोमन कॅथोलिक आहेत. जसे मूळचे कर्नाटकातील मंगळूरचे असलेले समाजवादी आणि साहजिकच नास्तिक प्रवृत्तीचे असलेले नेते जॉर्ज फर्नांडिस जन्माने रोमन कॅथोलिक होते. मी स्वतः कामिल पारखे मराठवाड्याचे आणि त्याचबरोबर पश्चिम महाराष्ट्रातील श्रीरामपूरचे नाते सांगणारा पण जन्माने रोमन कॅथोलिक आहे. 'जन्माने' असा मी उल्लेख मुद्दाम केला आहे काही गोष्टी निवडण्याचा आपल्याला अधिकार नसतो, उदाहरणार्थ आपले लिंग, आपले आईबाप, आपल्या चामडीचा रंग, आपली मातृभाषा, आपला मायदेश (किंवा पितृदेश) आणि अर्थात केवळ भारतात (आणि भारतीय संस्कृतीत) आपली जात. यापैकी फक्त काही गोष्टी नंतर बदलण्याचे स्वातंत्र्य आहे. धर्म, देश, नागरिकत्व अशा काही मोजक्या बाबी. काही जन्माधिष्टित बाबी मात्र अटळ असतात. नारायण गणेश तथा नानासाहेब गोरे, एस. एम. जोशी, कॉम्रेड श्रीपाद अमृत डांगे, कॉम्रेड बी. टी. रणदिवे, रेव्हरंड नारायण वामन टिळक, रेव्हरंड नारायण शेषाद्री परळीकर ही सर्व मंडळी जन्माने ब्राह्मण. त्यांनी विविध कारणांनी जानवे फेकले तरी त्यांचे जन्मतः मिळालेले ब्राह्मणत्व त्यांना कर्णाच्या कवचकुंडलीप्रमाणे चिकटून राह...